ହୀରାଖଣ୍ଡ ନାଗରିକ ପରିଷଦର କାର୍ଯ୍ୟକାରୀ କମିଟି ବୈଠକ

ସମ୍ବଲପୁର: ସମ୍ବଲପୁରର ହୀରାଖଣ୍ଡ ନାଗରିକ ପରିଷଦର କାର୍ଯ୍ୟକାରୀ କମିଟିର ବୈଠକ ସ୍ଥାନୀୟ ସାମ୍ବାଦିକ ଭବନ ଠାରେ ଶନିବାର ସନ୍ଧ୍ୟା ସମୟରେ ଅନୁଷ୍ଠିତ ହୋଇଯାଇଛି। ସଭାପତି ପ୍ରଫୁଲ୍ଲ ହୋତାଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ବିଭିନ୍ନ ଗୁରୁତ୍ୱପୁର୍ଣ୍ଣ ପ୍ରସଙ୍ଗ ଗୁଡିକ ଉପରେ ଆଲୋଚନା କରାଯାଇଛି। ବିଶେଷ କରି ସିକିଲ ସେଲ ଓ ଥାଲିସେମିଆ ପାଇଁ ଭିମସାର ଠାରେ ଏକ ରିସର୍ଚ୍ଚ ସେଣ୍ଟର ଖୋଲାଯିବାକୁ ଭାରତ ସରକାରଙ୍କ ନିକଟକୁ ଅନୁଷ୍ଠାନ ପକ୍ଷରୁ ଏକ ପତ୍ର ଲେଖି ଅନୁରୋଧ କରାଯିବାକୁ ସର୍ବ ସମ୍ମତି କ୍ରମେ ନିଷ୍ପତ୍ତି ନିଆଯାଇଛି। ପଶ୍ଚିମ ଓଡ଼ିଶାରେ ଅଧିକ ସଂଖ୍ୟକ ସିକିଲ ସେଲ ଓ ଥାଲିସେମିଆ ରୋଗୀ ଥିବା ବେଳେ ସେମାନଙ୍କର ସଂଖ୍ୟା ବୃଦ୍ଧି ପାଉଥିବାରୁ ଭିମସାର ଠାରେ ଏକ ୫୦ ଶଯ୍ୟା ବିଶିଷ୍ଟ ୟୁନିଟ କରିବାକୁ ମଧ୍ୟ ସରକାରଙ୍କୁ ଅନୁରୋଧ କରାଯିବ। ଏଥି ସହ ବରିଷ୍ଠ ନାଗରିକ ମାନଙ୍କ ପାଇଁ ଏକ କମ୍ୟୁନିଟି ହଲ ମଧ୍ୟ ନିର୍ମାଣ କରିବାକୁ ସରକାରଙ୍କ ନିକଟରେ ଅନୁରୋଧର ପ୍ରସ୍ତାବ ଗୃହୀତ ହୋଇଥିଲା। ବୈଠକରେ ଅନ୍ୟ ମାନଙ୍କ ମଧ୍ୟରେ ଡା. ଜୟଦେବ ମେହେର, ରତ୍ନଭୂଷଣ ପୃଷେଠ, ଅରବିନ୍ଦ ମହାପାତ୍ରଙ୍କ ସମେତ ଅନ୍ୟ ସଦସ୍ୟ ମାନେ ଉପସ୍ଥିତ ରହିଥିଲେ।