ମୁମ୍ବାଇ: ବଲିଉଡ୍ ଅଭିନେତା ସୈଫ୍ ଅଲ୍ଲୀ ଖାଁଙ୍କୁ ଆକ୍ରମଣ ଘଟଣାରେ ଗିରଫ ହୋଇଥିବା ସନ୍ଦିଗ୍ଧ ଆକାଶଙ୍କୁ ପଚରାଉଚରା କରାଯାଉଛି। ସନ୍ଦିଗ୍ଧ ଯୁବକକୁ ଛତିଶଗଡ଼ରୁ ଗିରଫ କରାଯାଇଥିଲା । ସନ୍ଦିଗ୍ଧ ଜଣକ ଜ୍ଞାନେଶ୍ୱରୀ ଏକ୍ସପ୍ରେସରେ ଯାତ୍ରା କରୁଥିବା ନେଇ ପୁଲିସକୁ ସୂଚନା ମିଳିଥିଲା ଏବଂ ସ୍ଥାନୀୟ ପୁଲିସ ସହାୟତାରେ ତାକୁ ଟ୍ରେନ୍ରୁ ଓହ୍ଲାଇ ପଚରାଉଚରା ପାଇଁ ନିଆଯାଇଥିଲା।
ଶାଲିମାର ଜ୍ଞାନେଶ୍ୱରୀ ଏକ୍ସପ୍ରେସ ମୁମ୍ବାଇରୁ କୋଲକାତା ଯାଏ ଚାଲିଥାଏ । ସନ୍ଦିଗ୍ଧ ଜଣକ ସେହି ଟ୍ରେନର ଜେନେରାଲ ବଗିରେ ଯାତ୍ରା କରୁଥିଲା। ଆରପିଏଫ୍ ପୁଲିସ ତାଙ୍କୁ ଗିରଫ କରିଥିଲା। ପୁଲିସ ପଚରାଉଚରାରେ ସନ୍ଦିଗ୍ଧ ବ୍ୟକ୍ତି ଜଣକ ନିଜ ନାମ ଆକାଶ କନୋଜିଆ ବୋଲି ପ୍ରକାଶ କରିଛନ୍ତି। ପଚରାଉଚରା ବେଳେ ସେ ବିଳାସପୁର ଯାଉଥିବା ପୁଲିସକୁ କହିଥିଲେ। ଜାଞ୍ଜଗିର ଚମ୍ପାରେ ତାଙ୍କର ଜଣେ ସମ୍ପର୍କୀୟ ରହୁଛନ୍ତି, ଯାହାଙ୍କୁ ସେ ଭେଟିବାକୁ ଯାଉଥିଲେ। ଅଭିଯୁକ୍ତଙ୍କ ନିକଟରୁ ମୁମ୍ବାଇ ପୁଲିସ ଦେଇଥିବା ନମ୍ବର ଜବତ କରାଯାଇଛି। ଏହାବ୍ୟତୀତ ତାଙ୍କ ନିକଟରୁ ସିସିଟିଭିରେ ଦେଖାଯାଉଥିବା ବ୍ୟାଗ୍ ମଧ୍ୟ ଜବତ କରାଯାଇଛି।
ସନ୍ଦିଗ୍ଧଙ୍କୁ ମୁମ୍ବାଇ ପୁଲିସ ଛତିଶଗଡ଼ର ଦୁର୍ଗ ଜିଲ୍ଲାରୁ ଅଟକ ରଖିଥିଲା। ସନ୍ଦିଗ୍ଧଙ୍କୁ ପଚରାଉଚରା କରାଯିବା ସହ ଏହି ମାମଲାରେ ତାଙ୍କର ଭୂମିକା ଯାଞ୍ଚ କରାଯାଉଛି। ଏହି ମାମଲାରେ ପୁଲିସ ଏପର୍ଯ୍ୟନ୍ତ ପ୍ରାୟ ୫୦ ଜଣଙ୍କୁ ପଚରାଉଚରା କରିଛି। ଏହି ମାମଲାରେ ମୋଟ ୩୫ଟି ଟିମ୍ ଗଠନ କରାଯାଇଛି, ଯେଉଁମାନେ ଅଭିଯୁକ୍ତଙ୍କୁ ସୁରାକ୍ ଖୋଜିବାରେ ଲାଗିଛନ୍ତି।
