ଭଦ୍ରକ, ୧୮।୧(ସନାତନ ରାଉତ)- ସରକାରୀ ଦରରେ ଧାନ କ୍ରୟ ବ୍ୟବସ୍ଥା ତଦାରଖ ଓ ମଣ୍ଡି ପରିଦର୍ଶନ ନେଇ ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ରଙ୍କ ଭଦ୍ରକ ଜିଲା ଗସ୍ତ ପରେ ମଣ୍ଡିରେ ଧାନ କିଣା ହାର ବୃଦ୍ଧି ହୋଇଛି l ଭଣ୍ଡାରି ପୋଖରୀ ବ୍ଲକର ତେଶୀଙ୍ଗା ସେବା ସମବାୟ ସମିତି ଦ୍ୱାରା ମଣ୍ଡିରେ ଧାନ କିଣା ନ ଯାଇ ସିଧାସଳଖ ମିଲକୁ ପଠାଇ ଦେବା, ମଣ୍ଡିରେ ସିସିଟିଭି କାମ ନ କରିବା ଆଦି ଅଭିଯୋଗ ତଦନ୍ତ ପରେ ସତ ଜଣା ପଡ଼ିବାରୁ ଅନିୟମିତତା ପାଇଁ ଉକ୍ତ କେନ୍ଦ୍ରର ଧାନ କ୍ରୟ ଅଧିକାରୀ ତଥା ସମ୍ପାଦକ ରାଜେନ୍ଦ୍ର କୁମାର ଖଣ୍ଡେଇ ଙ୍କୁ ପ୍ରଶାସନ ତରଫରୁ ବଦଳାଇ ଦିଆଯାଇଛି । ସେହିପରି ଭଦ୍ରକ ବ୍ଳକ ବହୁଦରଡାର ଶ୍ରୀରାମ ପାକସ ଦ୍ୱାରା ମଣ୍ଡିରେ ଧାନ କ୍ରୟ ଖୁବ ମନ୍ଥର ଥିବାରୁ ତାଙ୍କ ବିରୁଦ୍ଧରେ କାରଣ ଦର୍ଶାଅ ନୋଟିସ ଜାରି କରାଯାଇଛି । ମନ୍ତ୍ରୀଙ୍କ ଗସ୍ତର ପ୍ରଭାବ ରେ ଜିଲା ର ସମସ୍ତ ୧୫୦ ଟି ମଣ୍ଡି ଖୋଲାଯାଇ ଧାନ କ୍ରୟ ଆରମ୍ଭ କରାଯାଇଛି । ୧୬ ତାରିଖ ଗୁରୁବାର ଦିନ ଧାନ କିଣା ୧୦.୨% ଥିଲା ବେଳେ ଦୁଇଦିନ ମଧ୍ୟରେ ଶନି ବାର ସୁଦ୍ଧା ୨୦.୬୧% ଧାନ ମଣ୍ଡି ରେ କିଣା ଗଲାଣି । ଜିଲ୍ଲା ର ସମୁଦାୟ ପଞ୍ଜୀକୃତ ୮୦୫୩୩ ଜଣ ଚାଷୀ ଙ୍କ ମଧ୍ୟରୁ ୪୪୭୯ ଜଣ ଚାଷୀ ଅର୍ଥାତ୍ ୫.୫% ଚାଷୀ ଧାନ ବିକି ସାରିଲେଣି ।.
