ମୁମ୍ବାଇ: ଅପେକ୍ଷାର ଅନ୍ତ ହେଲା । ‘ବିଗ୍ ବସ୍ ୧୮’ର ବିଜେତା ହେଲେ ଅଭିନେତା କରଣ ବୀର ମେହେରା । ଶ୍ରେଷ୍ଠ ୬ ଜଣ ଫାଇନାଲିଷ୍ଟଙ୍କୁ ହରାଇ ଟ୍ରଫି ହାତେଇଲେ କରଣ । ‘ବିଗ୍ ବସ୍ ୧୮’କୁ ମିଳିଲା ନୂଆ ବିଜେତା । ସର୍ବାଧିକ ଭୋଟ ପାଇ ‘ବିଗ୍ ବସ୍ ୧୮’ ସିଜିନର ବିଜୟ ମୁକଟ ପିନ୍ଧିଛନ୍ତି କରଣ ବୀର ମେହେରା । କରଣଙ୍କୁ ସୋ’ର ହୋଷ୍ଟ ସଲମାନ ଖାନ୍ ବିଜେତା ଭାବେ ଘୋଷଣା କରିବା ପରେ ପ୍ରଶଂସକମାନେ ବେଶ ଖୁସି ହୋଇଛନ୍ତି । କରଣଙ୍କ ପ୍ରଶଂସକମାନେ ସୋସିଆଲ ମିଡ଼ିଆରେ ଲଗାତାର ଶୁଭେଚ୍ଛା ବାର୍ତ୍ତା ପୋଷ୍ଟ କରୁଛନ୍ତି ।
ରିପୋର୍ଟ ଅନୁଯାୟୀ, ଶ୍ରେଷ୍ଠ ୬ ଜଣ ଫାଇନାଲିଷ୍ଟଙ୍କ ମଧ୍ୟରୁ ପ୍ରଥମେ ଈଶା ସିଂ ବାହାରିଥିଲେ । ପରବର୍ତ୍ତୀ ଫାଇନାଲିଷ୍ଟରୁ ଚୁମ୍ ଦାରାଙ୍ଗ ବିଗ୍ ବସ୍ -୧୮ବିଜେତାରୁ ଓହରି ଯାଇଥିଲେ । ତାଙ୍କ ପରେ ଗ୍ରାଣ୍ଡ ପୁରସ୍କାର ଦୌଡ଼ରୁ ଅବିନାଶ ମିଶ୍ର ବାହାରିଥିଲେ । ଅବଶେଷରେ, ଅନେକ ପ୍ରତିଯୋଗୀଙ୍କୁ ପଛରେ ପକାଇ ବିଗ୍ ବସ୍ -୧୮ର ଟପ୍-୩ରେ ପହଞ୍ଚିଥିଲେ କରଣ ବୀର ମେହେରା, ଭିଭିଅନ୍ ଡିସେନା, ରଜତ ଦଲାଲ । ପରେ ରଜତ ଆଉଟ ହେବା ପରେ କରଣ ଏବଂ ଭିଭିଅନଙ୍କ ମଧ୍ୟରେ କିଏ ଜିତିବ ଟ୍ରଫି ସମସ୍ତଙ୍କ ନଜର ରହିଥିଲା । ଶେଷରେ ପ୍ରତି ସିଜନ୍ ପରି, ଏଥର ମଧ୍ୟ ସଲମାନ ଖାନ୍ ପୁରସ୍କାର ରାଶି ସହିତ କରଣ ବୀର ମେହେରାଙ୍କୁ ବିଗ ବସ୍ ୧୮ର ବିଜେତା ଘୋଷଣା କରିଥିଲେ । ଟ୍ରଫି ସହିତ, ଅଭିନେତା କରଣଙ୍କୁ ୫୦ ଲକ୍ଷ ଟଙ୍କାର ପୁରସ୍କାର ରାଶି ମଧ୍ୟ ମିଳିଛି ।
ବିଗ୍ ବସ୍ ୧୮ର ବିଷୟବସ୍ତୁ ଥିଲା ‘ଟାଇମ କା ତାଣ୍ଡବ’ । ଏହି ସିଜିନ୍ ୬ ଅକ୍ଟୋବର ୨୦୨୪ରେ ଆରମ୍ଭ ହୋଇଥିଲା ଏବଂ ୧୯ ଜାନୁଆରି ୨୦୨୫ରେ ଗ୍ରାଣ୍ଡ ଫିନାଲେ ସହିତ ଶେଷ ହୋଇଥିଲା । ଏହି ସିଜିନ୍ ୧୮ ଜଣ ପ୍ରତିଯୋଗୀଙ୍କ ସହିତ ଆରମ୍ଭ ହୋଇଥିଲା ।
