ଲଣ୍ଡନ,୨୨।୧୦: ଦୁନିଆର ସବୁଠାରୁ ଧନୀ ବ୍ୟକ୍ତି ଟେସ୍ଲା ଏବଂ ସ୍ପେସ୍ ଏକ୍ସ ମାଲିକ ଏଲୋନ ମସ୍କ ଏଭଳି ଏକ ଘୋଷଣା କରିଛନ୍ତି, ଯାହାକି କୋଟିପତି ହେବାର ସ୍ବପ୍ନକୁ ପୂରଣ କରିପାରିବ। ଆଜିଠାରୁ ସେ ପ୍ରତ୍ୟେହ ଜଣେ ବ୍ୟକ୍ତିଙ୍କୁ ୮,୦୦୦,୦୦,୦୦ ଟଙ୍କା ଦେବେ। ଏହି ପୁରସ୍କାର ପାଇଁ ସେ ଏକ ସର୍ତ୍ତ ସ୍ଥିର କରିଛନ୍ତି ଯାହା କେବଳ ତାଙ୍କ ବନ୍ଧୁ ଡୋନାଲ୍ଡ ଟ୍ରମ୍ପଙ୍କୁ ଉପକୃତ କରିବ। ତେବେ ମସ୍କ ତାଙ୍କର ଏହି ଯୋଜନାକୁ ନେଇ ବିବାଦକୁ ମଧ୍ୟ ଆସିଛନ୍ତି।
ଏଲୋନ ମସ୍କ ଏକ ଯୋଜନା ପ୍ରସ୍ତୁତ କରିଛନ୍ତି। ଏହି ଯୋଜନା ଅଧୀନରେ ସେ ଘୋଷଣା କରିଛନ୍ତି ଯେ ସେ ଆମେରିକାର ରାଷ୍ଟ୍ରପତି ନିର୍ବାଚନ ପର୍ଯ୍ୟନ୍ତ ପ୍ରତିଦିନ ଜଣେ ଭୋଟରଙ୍କୁ ୧ ମିଲିୟନ ଆମେରିକୀୟ ଡଲାର (ଭାରତୀୟ କୋଟିରେ ୮ କୋଟିରୁ ଅଧିକ) ଦେବେ। ଏହି ଯୋଜନାର ସର୍ତ୍ତ ଅନୁଯାୟୀ, ବିଜେତା ସେହି ଲୋକମାନଙ୍କ ମଧ୍ୟରୁ ଜଣେ ହେବେ ଯେଉଁମାନେ ମସ୍କଙ୍କ ଆମେରିକା PAC ନାମରେ ଥିବା ଯାଚିକାରେ ଦସ୍ତଖତ କରିବେ। ଏହି ଯୋଜନାରେ ଭାଗ ନେବାକୁ ହେଲେ ଆମେରିକାରେ ଭୋଟର ହେବା ବାଧ୍ୟତାମୂଳକ।
ପେନ୍ସିଲଭାନିଆର ହାରିସବର୍ଗରେ ଏକ ଅଭିଯାନ କାର୍ଯ୍ୟକ୍ରମରେ ମସ୍କ କହିଛନ୍ତି: “ଆମେ ଏକ ମିଲିୟନରୁ ଅଧିକ, ବୋଧହୁଏ ପ୍ରଥମ ଏବଂ ଦ୍ୱିତୀୟ ସଂଶୋଧନକୁ ସମର୍ଥନ କରି ଏକ ଯାଚିକାରେ ଦସ୍ତଖତ କରିବାକୁ ୨ ମିଲିୟନ ଭୋଟରଙ୍କୁ ପ୍ରେରଣା ଦେବାକୁ ଚାହୁଁଛୁ। ବର୍ତ୍ତମାନଠାରୁ ଆରମ୍ଭ କରି ନିର୍ବାଚନ ପର୍ଯ୍ୟନ୍ତ ପ୍ରତ୍ୟେକ ଦିନ ଯାଚିକାରେ ଦସ୍ତଖତ କରୁଥିବା ଲୋକଙ୍କ ମଧ୍ୟରୁ ଜଣଙ୍କୁ ୧ ମିଲିୟନ ଡଲାର୍ ପୁରସ୍କାର ଦେବାକୁ ଯାଉଛୁ।
ବର୍ତ୍ତମାନ ଆମେରିକାରେ ରାଷ୍ଟ୍ରପତି ନିର୍ବାଚନ ଚାଲିଛି। ଯେଉଁଥିରେ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରିପବ୍ଲିକାନ ପାର୍ଟିର ପ୍ରାର୍ଥୀ ଅଟନ୍ତି। ଏହି ନିର୍ବାଚନରେ ମସ୍କ ତାଙ୍କ ବନ୍ଧୁ ଟ୍ରମ୍ପଙ୍କୁ ଖୋଲାଖୋଲି ସମର୍ଥନ କରୁଛନ୍ତି। କୁହାଯାଉଛି ଯେ ଟ୍ରମ୍ପଙ୍କ ସମର୍ଥନରେ ମସ୍କ ଏହି ଯୋଜନା ପ୍ରସ୍ତୁତ କରିଛନ୍ତି, ଯାହାଫଳରେ ଟ୍ରମ୍ପଙ୍କ ସପକ୍ଷରେ ଏକ ପରିବେଶ ସୃଷ୍ଟି ହୋଇପାରିବ। ରିପୋର୍ଟରେ ଦର୍ଶାଯାଇଛି ଯେ ପଞ୍ଜୀକୃତ ହୋଇ ନ ଥିବା ଲୋକଙ୍କୁ ଟଙ୍କା ପ୍ରଦାନ କରିବା ଫେଡେରାଲ ଆଇନର ଉଲ୍ଲଂଘନ ହୋଇପାରେ। ଏଣୁ ମସ୍କଙ୍କ ଏହି ଯୋଜନା ସମ୍ପର୍କରେ ତଦନ୍ତ ପାଇଁ ମଧ୍ୟ ଦାବି କରାଯାଇଛି।
ନଭେମ୍ବରରେ ଆମେରିକାରେ ରାଷ୍ଟ୍ରପତି ନିର୍ବାଚନ ହେବ। ରାଷ୍ଟ୍ରପତି ପଦ ପାଇଁ ପ୍ରତିଯୋଗିତା ମୁଖ୍ୟତଃ ରିପବ୍ଲିକାନ ଡୋନାଲ୍ଡ ଟ୍ରମ୍ପ ଏବଂ ଡେମୋକ୍ରାଟିକ କମଲା ହାରିସ୍ଙ୍କ ମଧ୍ୟରେ ହେଉଛି। ଡୋନାଲ୍ଡ ଟ୍ରମ୍ପ ପୂର୍ବତନ ରାଷ୍ଟ୍ରପତି ହୋଇଥିବାବେଳେ କମଲା ହାରିସ ବର୍ତ୍ତମାନ ଆମେରିକାର ଉପରାଷ୍ଟ୍ରପତି ଅଛନ୍ତି।
