କୋରାପୁଟ,୩ା୧(ଅମିତାଭ ବେହେରା): କୋରାପୁଟସ୍ଥିତ ସ୍ଥାନୀୟ ଦକ୍ଷତା ବିକାଶ ତାଲିମ କେନ୍ଦ୍ରଠାରେ ଜଳ ସମ୍ପଦ ବିଭାଗ ଓଡ଼ିଶା ତରଫରୁ ଜିଲାସ୍ତରୀୟ ପାଣି ପଞ୍ଚାୟତ ପକ୍ଷ ପାଳନ କରାଯାଇଥିଲା l ଜିଲା ଉଠାଜଳସେଚନ ବିଭାଗର ନିର୍ବାହୀଯନ୍ତ୍ରୀ ଯୁଗଳକିଶୋର ଟାକ୍ରୀଙ୍କ ଅଧ୍ୟକ୍ଷତାରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ପଟ୍ଟାଙ୍ଗି ବିଧାୟକ ରାମଚନ୍ଦ୍ର କାଡାମ, କୋରାପୁଟ ବିଧାୟକ ରଘୁରାମ ମାଛ ଓ ଲକ୍ଷ୍ମୀପୁର ବିଧାୟକ ପବିତ୍ର ସାଉଁନ୍ତ ଯୋଗ ଦେଇଥିଲେ l କୋରାପୁଟ ଜିଲା ହେଉଛି କୃଷି ବହୁଳ ଜିଲା। ଏହି ଜିଲାରେ ପ୍ରାୟ ୮୦ ଭାଗ ଚାଷ ଉପରେ ନିର୍ଭର କରୁଛନ୍ତି l କୃଷି ଓ କୃଷକମାନଙ୍କର ସମୃଦ୍ଧି କରିବା ପାଇଁ ପାଣି ପଞ୍ଚାୟତ କାର୍ଯ୍ୟକ୍ରମ କରାଯାଉଛି l ପାଣିକୁ କିପରି ଉପଯୁକ୍ତ ଭାବେ ସଂରକ୍ଷଣ କରିବା ସହିତ କିପରି ପାଣିକୁ କ୍ଷେତରେ ବିନିଯୋଗ କରି ପାରିବା ଓ ତା ସହିତ ସରକାରଙ୍କ ତରଫରୁ ଆସୁଥିବା ବିଭିନ୍ନ ସ୍କିମରେ କିପରି ସାମିଲ ହୋଇ ଚାଷୀ ତା’ର ଲାଭ ଉଠାଇ ପାରିବେ ସେ ନେଇ ଆଲୋଚନା କରାଯାଇଥିଲା।
ଜିଲାସ୍ତରୀୟ ପାଣି ପଞ୍ଚାୟତ ପକ୍ଷ ପାଳନ କାର୍ଯ୍ୟକ୍ରମରେ ଚାଷୀଙ୍କ ଦେଖା ମିଳି ନ ଥିଲା। ଜିଲା ସ୍ତରୀୟ ପାଣି ପଞ୍ଚାୟତ କାର୍ଯ୍ୟକ୍ରମରେ ଚାଷୀଙ୍କୁ ଡକା ନ ଯିବାକୁ ନେଇ କୋରାପୁଟ ବିଧାୟକ ରଘୁରାମ ମାଛ ଓ ଲକ୍ଷ୍ମୀପୁର ବିଧାୟକ ପବିତ୍ର ସାଉଁନ୍ତ ଅସନ୍ତୋଷ ପ୍ରକାଶ କରିବା ସହିତ ଅଧିକାରୀମାନଙ୍କୁ ତାଗିଦ କରିଥିଲେ। କୋରାପୁଟ ଜିଲାରେ ୮୦ ଭାଗ ଲୋକେ ଚାଷ ଉପରେ ନିର୍ଭର କରୁଥିବା ବେଳେ ୩୦ ଭାଗ ଚାଷୀଙ୍କ ଜମିକୁ ପାଣି ମାଡ଼ି ପାରୁନାହିଁ l ଅଧିକାରୀମାନେ ନିଜ ନିଜ ଭିତରେ କାର୍ଯ୍ୟକ୍ରମ ସାରି ଦେଉଛନ୍ତି। ଚାଷୀଙ୍କୁ ପ୍ରାଧାନ୍ୟ ଦେଉନାହାନ୍ତି।
ସେହିପରି ପଟ୍ଟାଙ୍ଗି ବିଧାୟକ ରାମଚନ୍ଦ୍ର କାଡାମ ତାଙ୍କ ନିର୍ବାଚନ ମଣ୍ଡଳୀ ଅଧୀନରେ ଥିବା ନନ୍ଦପୁର, ପଟାଙ୍ଗୀ ଓ ସେମିଲିଗୁଡ଼ା ବ୍ଲକ ଅଞ୍ଚଳରେ ବହୁ ଚାଷୀଙ୍କ ଜମିରେ ପାଣି ନ ଯୋଗାଇ ଜଳକର ଆସୁଥିବା ଅଭିଯୋଗ କରିବା ସହ ଏଦିଗରେ ତୁରନ୍ତ ସମ୍ପୃକ୍ତ ବିଭାଗର ଅଧିକାରୀ କାର୍ଯ୍ୟାନୁଷ୍ଠାନ ଗ୍ରହଣ କରିବାର ରହିଛି ବୋଲି ସେ ପ୍ରକାଶ କରିଛନ୍ତି।
ସେହିପରି ଆୟୋଜିତ କାର୍ଯ୍ୟକ୍ରମରେ ଚାଷୀମାନଙ୍କୁ ସୂଚନା ଦିଆ ଯାଇ ନ ଥିବା କଥା ଚାଷୀ କହିଛନ୍ତି l ଗତ ୨୪ ବର୍ଷ ଶାସନ କାଳରେ ଅଧିକାରୀମାନେ ମନମୁଖୀ ହୋଇଯାଇଛନ୍ତି l ସେମାନଙ୍କୁ ତାଗିଦ କରାଯାଇ ଚାଷ ଓ ଚାଷୀଙ୍କ ଉନ୍ନତି ପ୍ରତି ଦୃଷ୍ଟି ଦିଆଯିବ ବୋଲି କୋରାପୁଟ ବିଧାୟକ ରଘୁରାମ ମାଛ କହିଛନ୍ତି l
