ଘୋରଡିଆରେ ବୋମାମାଡ: ୨ପ୍ଲାଟୁନ୍‍ ଫୋର୍ସ ମୂତୟନ, ସାଇଣ୍ଟିଫିକ୍ ଟିମର ତଦନ୍ତ ଜାରି

ପିପିଲି: ପୁରୀ ଜିଲ୍ଲା ଡେଲାଙ୍ଗ ଥାନା ଅନ୍ତର୍ଗତ ଘୋରଡିଆ ଗାଁରେ ବୋମାମାଡ।  ପୂର୍ବ ବିବାଦକୁ କେନ୍ଦ୍ର କରି ଗତ ୨୧ ତାରିଖରେ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଥିଲା । ଏଥିରେ ଜଣେ ଗୁରୁତର ହୋଇ ଭୁବନେଶ୍ୱରର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିବା ସୂଚନା ମିଳିଛି । ଏହି ଘଟଣାରେ ଡେଲାଙ୍ଗ ପୁଲିସ ୨ଜଣଙ୍କୁ ଗିରଫ କରିଥିଲା । ଏହି ଘଟଣାକୁ କେନ୍ଦ୍ର କରି ୨୧ ତାରିଖ ଠାରୁ ସେଠାରେ ଦୁଇଗୋଷ୍ଠୀ ମଧ୍ୟରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଛି । ତେବେ ମଙ୍ଗଳବାର ରାତିରେ ଲାଇନ୍‍ କଟିଥିବା ବେଳେ ସାଢେ ୯ଟାରୁ ୧୦ଟା ମଧ୍ୟରେ ଅନ୍ଧାରର ସୁଯୋଗ ନେଇ କୌଣସି ଅସାମାଜିକ ବ୍ୟକ୍ତି ସେଠାରେ ଗୋଟିଏ ବୋମାମାଡ କରିଥିବା ସୂଚନା ମିଳିଛି । ସେଠାକାର ଏକ ବିଦ୍ୟାଳୟର ପ୍ରାଚୀର ନିକଟରେ ବୋମାଟି ବିସ୍ଫୋରଣ ହୋଇଥିବା ସଂପର୍କରେ ପୁଲିସ ସୂତ୍ରରୁ ସୂଚନା ମିଳିଛି । ବୋମାର ପ୍ରଚଣ୍ଡ ଶବ୍ଦରେ ଆଖପାଖ ଅଞ୍ଚଳ ଥରି ଉଠିଥିବା ବେଳେ ଖବର ପାଇ ପୁରୀର ଅତିରିକ୍ତ ଏସ୍‍ପି ବିଷ୍ଣୁ ପ୍ରସାଦ ପତି, ପିପିଲି ଏସ୍‍ଡିପିଓ ବିରଞ୍ଚି ପତି ଓ ଡେଲାଙ୍ଗ ଥାନାଧିକାରୀ ଦେବାଶିଷ ମହାନ୍ତି ପ୍ରମୁଖ ଘଟଣାସ୍ଥଳରେ ପହଞ୍ôଚ ଘଟଣାର ଅନୁସନ୍ଧାନ ଚଳାଇଛନ୍ତି । ଘଟଣାସ୍ଥଳରେ ଫୁଟା ବୋମାର ଛିଣ୍ଡା ସୁତୁଲି, ଗୋଡି ଆଦି ପଡିଥିବା ବେଳେ ଆଜି ସକାଳୁ ସାଇଣ୍ଟିଫିକ୍‍ ଟିମ୍‍ ଘଟଣାସ୍ଥଳକୁ ଯାଇ ଅଧିକ ତଦନ୍ତ ଜାରି ରଖିଛି।  ଏହି ଘଟଣାରେ ସଂପୃକ୍ତ ଥିବା ଅସାମାଜିକ ବ୍ୟକ୍ତିଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି । ଏହି ଘଟଣାକୁ କେନ୍ଦ୍ର କରି ସେଠାରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିବା ସୂଚନା ମିଳିଛି । ମଙ୍ଗଳବାର ରାତି ୧୨ଟା ସୁଦ୍ଧା ଘୋରଡିଆରେ ମୋଟ୍‍ ୨ ପ୍ଲାଟୁନ୍‍ ଫୋର୍ସ ମୂତୟନ କରାଯାଇଥିବା ବେଳେ ପୁଲିସ ସମଗ୍ର ଅଞ୍ଚଳରେ ରାତ୍ର ପେଟ୍ରୋଲିଂକୁ କଡାକଡି କରିଛି । ପୁଲିସ ଗାଡି ଘନ ଘନ ସମଗ୍ର ଅଞ୍ଚଳରେ ପଇଁତରା ମାରୁଛି ।