୪୦ ବର୍ଷ ପରେ ଆହ୍ଲାବାଦରେ ଜିତିଲା କଂଗ୍ରେସ
ନୂଆଦିଲ୍ଲୀ: ଦୀର୍ଘ ୪୦ ବର୍ଷ ପରେ କଂଗ୍ରେସ ଉତ୍ତରପ୍ରଦେଶର ଆହ୍ଲାବାଦ ଆସନରେ ଜିତିଛି। ନିର୍ବାଚନ କମିସନ ତଥ୍ୟ ଅନୁଯାୟୀ କଂଗ୍ରେସ ପ୍ରାର୍ଥୀ ଉଜ୍ଜ୍ବଳ ରମଣ ସିଂହ ଆହ୍ଲାବାଦ ଆସନରେ ୫୮ ହଜାରରୁ ଅଧିକ ଭୋଟ୍ରେ ବିଜୟୀ ହୋଇଛନ୍ତି। ତେବେ ଶେଷ ଥର ପାଇଁ ସଙ୍ଗମ ସହର ୧୯୮୪ ଲୋକସଭା ନିର୍ବାଚନରେ ଜଣେ କଂଗ୍ରେସ ସାଂସଦଙ୍କୁ ନିର୍ବାଚିତ କରିଥିଲା। ୧୯୮୪ରେ ଅମିତାଭ ବଚ୍ଚନ ଏହି ଆସନରୁ ଜିତିଥିଲେ। ଏବେ ବିଜେପିର ନିରଜ ତ୍ରିପାଠୀଙ୍କୁ କଂଗ୍ରେସର ଉଜ୍ଜ୍ବଳ ରମଣ ହରାଇ ଦେଇଛନ୍ତି। ତେବେ ଆହ୍ଲାବାଦରେ ଉତ୍ତରପ୍ରଦେଶର ୨ ପ୍ରମୁଖ ରାଜନେତାଙ୍କ ପୁଅଙ୍କ ମଧ୍ୟରେ ଲଢ଼େଇ ହୋଇଥିଲା। ଉଜ୍ଜ୍ବଳ ରମଣ ସିଂହଙ୍କ ବାପା ରେବତୀ ରମଣ ସିଂହ ୨୦୦୪ ଏବଂ ୨୦୦୯ରେ ଆହ୍ଲାବାଦ ଆସନରେ ଜିତି ଲୋକସଭାକୁ ପ୍ରତିନିଧିତ୍ବ କରିଥିଲେ। ଅନ୍ୟପକ୍ଷେ ନିରଜ ତ୍ରିପାଠୀଙ୍କ ବାପା କେଶରୀ ନାଥ ତ୍ରିପାଠୀ ଆହ୍ଲାବାଦ ଦକ୍ଷିଣରୁ ୫ ଥର ବିଧାୟକ ହୋଇଛନ୍ତି। ସେ ରାଜ୍ୟ ବିଧାନସଭାର ପୂର୍ବତନ ବାଚସ୍ପତି। ସେ ମଧ୍ୟ ପଶ୍ଚିମବଙ୍ଗ, ବିହାର, ମିଜୋରାମ ଏବଂ ମେଘାଳୟ ରାଜ୍ୟପାଳ ଭାବେ ଦାୟିତ୍ବ ତୁଲାଇଥିଲେ।
