କୁଚିଣ୍ଡା,୧୯ା୧(ବିରଞ୍ଚି ଦର୍କା): ସମ୍ବଲପୁର ଜିଲା କୁଚିଣ୍ଡା ବ୍ଲକ ଅଞ୍ଚଳରେ ଏମ୍ଜିଏନ୍ଆରଇଜିଏସ୍ରେ ବିଭିନ୍ନ ପ୍ରକଳ୍ପ କାମ ହେଉଛି। କୁଚିଣ୍ଡା ବ୍ଲକ ଖଣ୍ଡୋକଟା ପଞ୍ଚାୟତର ଜୁନାନୀ ଗ୍ରାମର ଚାଷଜମିକୁ ଜଳସେଚନ ନିମନ୍ତେ ଏମ୍ଜିଏନ୍ଆର୍ଇଜିଏସ୍ରେ ୧୦ଲକ୍ଷ ଟଙ୍କାର ବ୍ୟୟ ଅଟକଳରେ ବ୍ଲକ ପକ୍ଷରୁ ଏକ କେନାଲ ଖନନ ହେଉଛି। ଇତି ମଧ୍ୟରେ ଶ୍ରମିକମାନେ ମାଟି କେନାଲ କାମ ଆରମ୍ଭ କରିଛନ୍ତି। କାମ ଆରମ୍ଭ ପରେ ଶନିବାର ତଦାରଖ ନିମନ୍ତେ କୁଚିଣ୍ଡା ବିଡିଓ ଜୟନ୍ତ ସାହୁ, ସହକାରୀ ଯନ୍ତ୍ରୀ ଶ୍ୟାମସୁନ୍ଦର ମାଝି, ଏପିଓ କୁଳବନ୍ତ ବା, ଖଣ୍ଡୋକଟା ସରପଞ୍ଚ କୁନି ସେଉଳ ଏବଂ ଏଡିଇଓ କବିତା ଆଚାର୍ଯ୍ୟ କାର୍ଯ୍ୟସ୍ଥଳରେ ପହଞ୍ଚି ଥିଲେ। ଶ୍ରମିକମାନେ କେନାଲ କାମ କରୁଥିବା ଦେଖି ବିଡିଓ ଖୁସିବ୍ୟକ୍ତ କରିଥିଲେ।
ଶ୍ରମିକମାନଙ୍କୁ ଉତ୍ସାହିତ କରିବା ଉଦ୍ଦେଶ୍ୟରେ ବିଡିଓ ସାହୁ କୋଡିରେ ମାଟି ଖୋଳିଥିବା ବେଳେ ମହିଳା ସରପଞ୍ଚ ସେଉଳ ନିଜକୁ ସମ୍ଭାଳି ନ ପାରି ଟୋକେଇ(ଝୁଡି)ରେ ମାଟି ମୁଣ୍ଡେଇ ବୋହିଥିଲେ। ନିୟୋଜିତ ମହିଳାପୁରୁଷ ଶ୍ରମିକଙ୍କୁ ବର୍ଷସାରା ଏଭଳି କାମ ଯୋଗାଇ ଦେଲେ ସେମାନେ ଉପକୃତ ଦେବେ ବୋଲି ବିଡିଓଙ୍କୁ କହିଥିଲେ। ବିଡିଓ ଏବଂ ସରପଞ୍ଚଙ୍କ ଏଭଳି କାର୍ଯ୍ୟକୁ ଜୁନାନୀ ଗ୍ରାମବାସୀ ପ୍ରଶଂସା କରିଥିଲେ। ଏହି କେନାଲ ଦ୍ବାରା ଚାଷଜମିରେ ଜଳସେଚନ ହୋଇ ମରୁଡି କବଳରୁ ମୁକ୍ତି ମିଳିବ ବୋଲି ସେ କହିଛନ୍ତି।
