ମଣିପୁର : ସଚିବାଳୟ ଓ ମୁଖ୍ୟମନ୍ତ୍ରୀ ଆବାସ ନିକଟରେ ଲାଗିଲା ନିଆଁ
ଇମ୍ଫାଲ: ମଣିପୁରର ରାଜଧାନୀ ଇମ୍ଫାଲରେ ହାଇସିକ୍ୟୁରିଟି ଜୋନରେ ଥିବା ସଚିବାଳୟ କମ୍ପ୍ଲେକ୍ସ ନିକଟରେ ଥିବା ଏକ କୋଠାରେ ଆଜି ଅଗ୍ନିକାଣ୍ଡ ଘଟିଛି। ଗୁରୁତ୍ବପୂର୍ଣ୍ଣ କଥା ହେଉଛି ମୁଖ୍ୟମନ୍ତ୍ରୀ ଏନ୍ ବିରେନ ସିଂହଙ୍କ ସରକାରୀ ବଙ୍ଗଳାଠାରୁ ମାତ୍ର କିଛି ଶହ ମିଟର ଦୂରରେ ଏହି କୋଠା ରହିଛି। ଅଗ୍ନିକାଣ୍ଡ ଖବର ପାଇବା ପରେ ୪ଟି ଦମକଳ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। ନିଆଁକୁ ଆୟତ୍ତ କରାଯାଇଛି ବୋଲି ପୁଲିସ କହିଛି। ଅଗ୍ନିକାଣ୍ଡର କାରଣ ପୁଲିସ ଏପର୍ଯ୍ୟନ୍ତ ଜାଣିପାରିନାହିଁ।
Sambad is now on WhatsApp
Join and get latest news updates delivered to you via WhatsApp
କୁକି ଜନଜାତିର ନାଗରିକ ସଂଗଠନ କୁକି ଇମ୍ପିର ମୁଖ୍ୟ କାର୍ଯ୍ୟାଳୟ ପରିସରରେ ଏହି କୋଠାଟି ଅବସ୍ଥିତ । ମଣିପୁରକୁ ଅଲଗା କରି ଏକ ପୃଥକ ପ୍ରଶାସନ ଗଠନ କରିବା ପାଇଁ ଚୁରାଚାନ୍ଦପୁରର ଅନ୍ୟ ଏକ କୁକି ଗ୍ରୁପ୍ ଇଣ୍ଡିଜିନିୟସ୍ ଟ୍ରାଇବଲ୍ ଲିଡର୍ସ ଫୋରମ୍ (ଆଇଟିଏଲଏଫ)ର ଆହ୍ୱାନକୁ କୁକି ଇମ୍ପି ସମର୍ଥନ କରୁଛନ୍ତି। ସୂତ୍ରରୁ ପ୍ରକାଶ ଯେ ସେମାନେ ଜାଣିଶୁଣି ନିଆଁ ଲଗାଇବାକୁ ଅସ୍ୱୀକାର କରୁନାହାଁନ୍ତି ।
ଆସାମ ସୀମାନ୍ତ ମଣିପୁରର ଜିରିବାମ ଜିଲ୍ଲାରେ ଉପତ୍ୟକା ଅଧ୍ୟୁଷିତ ମେଇତେଇ ସମ୍ପ୍ରଦାୟ ଏବଂ ପ୍ରଭାବଶାଳୀ ହମାର ଜନଜାତିଙ୍କ ମଧ୍ୟରେ ପୁଣି ଥରେ ହିଂସା କାଣ୍ଡ ଘଟିବାର ଏକ ସପ୍ତାହ ରୁ କମ୍ ସମୟ ପରେ ଏହି ଘଟଣା ଘଟିଛି। ଏହି କାରଣରୁ ଏହାକୁ ଗୁରୁତ୍ବ ଦିଆଯାଉଛି ।
