ନୀଳଗିରି: ତୃତୀୟ ଶ୍ରୀକ୍ଷେତ୍ର ନୀଳଗିରିର ଆରାଧ୍ୟ ଦେବତା ମହାପ୍ରଭୁ ଶ୍ରୀଜଗନ୍ନାଥ ଓ ବଡ଼ଭାଇ ବଳଭଦ୍ରଙ୍କୁ ରୌପ୍ୟ ଶ୍ରୀପୟର(ଗୋଡ଼) ଅର୍ପଣ କରିଛନ୍ତି ସ୍ଥାନୀୟ ବିଧାୟକ ସନ୍ତୋଷ ଖଟୁଆ । ପ୍ରାୟ ୨ମାସ ପୂର୍ବରୁ ନୀଳଗିରି ବିଧାୟକ ସନ୍ତୋଷ ଖଟୁଆ ଶ୍ରୀମନ୍ଦିର ପରିଦର୍ଶନରେ ଯାଇ ବଡ଼ଠାକୁର କାଳିଆ ଓ ବଡ଼ଭାଇ ବଳିଆଙ୍କୁ ଶ୍ରୀପୟର ଯୋଗାଇ ଦେବାକୁ ମନସ୍ଥ କରିଥିଲେ । ଆଜି ବାହୁଡ଼ା ଯାତ୍ରାର ପ୍ରଥମ ଦିନରେ ସାଢ଼େ ୮କିଲୋ ଓଜନର ରୂପା ଶ୍ରୀପୟର ଯୋଗାଇ ଦେଇଛନ୍ତି । ଯାହାର ମୂଲ୍ୟ ୧୨ଲକ୍ଷ ଟଙ୍କା ବୋଲି ଜଣାପଡ଼ିଛି ।
ବାଲେଶ୍ୱରର ଏକ ଜୁଏଲାରୀ ମାଲିକଙ୍କୁ ବିଧାୟକ ଶ୍ରୀ ଖଟୁଆ ପୟର ଯୋଗାଇ ଦେବାକୁ କହିବା ପରେ ଏହି କାର୍ଯ୍ୟ ଦୀର୍ଘ ୨ମାସ ଧରି ଚାଲିଥିଲା । ତାମିଲନାଡ଼ୁର କୋୟମ୍ବଟୁର ଅଞ୍ଚଳର କାରିଗରମାନେ ଏହି ପୟର ନିର୍ମାଣ କାର୍ଯ୍ୟରେ ଲାଗି ପଡ଼ିଥିଲେ । ଆଜି ସନ୍ଧ୍ୟାରେ ଏହି ରୌପ୍ୟ ପୟରକୁ ବିଧାୟକ ଶ୍ରୀ ଖଟୁଆ କିଣି ଆଣିବା ପରେ ଦେବୋତ୍ତର ବିଭାଗ ଅଧୀନରେ ପରିଚାଳିତ ନୀଳଗିରିସ୍ଥିତ ଠାକୁରମାହାଲ କାର୍ଯ୍ୟାଳୟରେ ପହଞ୍ଚି ଅର୍ପଣ କରିଛନ୍ତି । ଅର୍ପଣ ସମୟରେ ନୀଳଗିରି ରାଜାସାହେବ ଜୟନ୍ତ ଚନ୍ଦ୍ର ମର୍ଦ୍ଦରାଜ ହରିଚନ୍ଦନ, ବ୍ରହ୍ମା ସରୋଜ ନନ୍ଦ, ପୂଣ୍ୟଶ୍ଳୋକ ନନ୍ଦ, ସମାଜସେବୀ ସୁରଞ୍ଜନ ମହାପାତ୍ର ପ୍ରମୁଖ ଉପସ୍ଥିତ ରହିଥିଲେ । ଏହି ଉପଲକ୍ଷେ ଠାକୁରମାହାଲ ସଂସ୍ଥା ପକ୍ଷରୁ ବିଧାୟକ ଶ୍ରୀ ଖଟୁଆଙ୍କୁ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା ।
