ଦାନଗଦି : ଯାଜପୁରରୋଡ ଥାନା ଗାୟତ୍ରୀ ବିହାର ଅଞ୍ଚଳରେ ଗୁରୁବାର ବିଳମ୍ବିତ ରାତିରେ ଚୋରି ହୋଇଛି l ଘରେ କେହି ନଥିବାର ସୁଯୋଗ ନେଇ ଦୁର୍ବୃତ୍ତ ଘରର ତାଲା ଭାଙ୍ଗି ୨୦୦ ଗ୍ରାମ ଓଜନର ସୁନା ଅଳଙ୍କାର, ଏକ ଲାପଟପ, ଗୋଟିଏ ଟାବଲେଟ ଓ ଏକ ମୋବାଇଲ ଫୋନ ଲୁଟି ନେଇଛନ୍ତି। ସକାଳେ ଘରୁ ଚୋରି ହୋଇଥିବା ଜଣାପଡିବା ପରେ ପଡୋଶୀଙ୍କ ଠାରୁ ସୂଚନା ପାଇ କେବଳ ପାଟ୍ରୋଲିଂ ଗାଡି ଘଟଣା ସ୍ଥଳରେ ପହଞ୍ଚିଥିବା ବେଳେ ସ୍ଥାନୀୟ ପୁଲିସ ଘଟଣାସ୍ଥଳ ପରିଦର୍ଶନ କରିନଥିବା ଜଣାପଡ଼ିଛି । ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ସୂଚନା ମୁତାବକ ରେଳରେ ଲୋକ ପାଇଲଟ ଭାବେ କାମ କରୁଥିବା ଆନ୍ଧ୍ରପ୍ରଦେଶର ପଲାସା କେ. ଶଙ୍କର ପରିବାର ସହିତ ଗାୟତ୍ରୀ ବିହାରର ମନ୍ଦିର କଲୋନୀରେ ବର୍ଷକ ତଳୁ ଭଡା ଘରେ ରହୁଥିଲେ । ଗତ ୧୧ ତାରିଖ ଠାରୁ ପୋଙ୍ଗଲ ପାଇଁ ସପରିବାର ଗାଁକୁ ଯାଇଥିବା ବେଳେ ତଳେ ଥିବା ଭଡାଟିଆ ଗୁରୁବାର ନୂଆ ଘରକୁ ସିଫ୍ଟ ହୋଇଥିଲେ । ଏହି ସୁଯୋଗରେ ଲୁଟେରା ସବୁ ଘରର ତାଲା ଭାଙ୍ଗି ଘରେ ଥିବା ହାର, ମଙ୍ଗଲ ସୂତ୍ର, ମଥାମଣି, ହାତ ମୁଦି, କାନଫୁଲ ଓ ଚେନ୍ ଆଦି ୨୦୦ ଗ୍ରାମ ଓଜନର ସୁନା ଅଳଙ୍କାର, ଲାପଟପ, ଟାବଲେଟ, ମୋବାଇଲ ଫୋନ ଓ ନଗଦ ୨୫ ହଜାର ଟଙ୍କା ଲୁଟି ନେଇଛନ୍ତି ।
