ତିରୁବନନ୍ତପୁରମ୍: କେରଳର ଜଣେ ଦଳିତ ଝିଅ ଦାବି କରିଛନ୍ତି ଯେ ଗତ ପାଞ୍ଚ ବର୍ଷ ମଧ୍ୟରେ ତାଙ୍କୁ ୬୪ ଜଣ ଲୋକ ଦୁଷ୍କର୍ମ କରିଛନ୍ତି। ତାଙ୍କର ଏପରି ଅଭିଯୋଗ ପରେ ଏବେ ଏକ ମାମଲା ରୁଜୁ ହୋଇ ତଦନ୍ତ ଆରମ୍ଭ ହୋଇଛି। ନାବାଳିକାଙ୍କ ମୁହଁରୁ ଏକଥା ଶୁଣିବା ପରେ ଶିଶୁ କଲ୍ୟାଣ କମିଟି (ସିଡବ୍ଲୁସି)ର ଅଭିଯୋଗ ପରେ ପଠନମଥିଟ୍ଟା ପୁଲିସ ଏହି ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ଏହି ଘଟଣା ସେତେବେଳେ ଲୋକଲୋଚନକୁ ଆସିଲା ଯେତେବେଳେ ‘ମହିଳା ସମାକ୍ଷା’ ନାମକ ଏକ ସ୍ବେଚ୍ଛାସେବୀ ସଂଗଠନର ଜଣେ ସଦସ୍ୟ ନାବାଳିକାଙ୍କ ଘରକୁ ଗଲେ। ସଦସ୍ୟ ଜଣକ ପୀଡ଼ିତାଙ୍କ ଘରେ ପହଞ୍ଚିବା ପରେ ସେ ପାଞ୍ଚ ବର୍ଷ ଧରି ଅନୁଭବ କରିଥିବା ଭୟଙ୍କର କଥା ବର୍ଣ୍ଣନା କରିଥିଲା। ତାପରେ ଏନଜିଓ ପଠନମଥିଟ୍ଟା ଜିଲ୍ଲାର ଶିଶୁ କଲ୍ୟାଣ କମିଟିକୁ ଏନେଇ ଏକ ରିପୋର୍ଟ କରିଥିଲା।
ସିଡବ୍ଲୁସିର ହସ୍ତକ୍ଷେପ ପରେ ପୀଡ଼ିତା ଅଭିଯୋଗ ଆଣିଛନ୍ତି ଯେ ତାଙ୍କ ପଡ଼ୋଶୀ ତାଙ୍କ ସହିତ ମାତ୍ର ୧୩ ବର୍ଷ ବୟସରେ ନିର୍ଯାତନା ଆରମ୍ଭ କରିଥିଲେ। ସେ ବର୍ତ୍ତମାନ ୧୮ ବର୍ଷ ବୟସର। ସ୍କୁଲରେ କ୍ରୀଡାରେ ସକ୍ରିୟ ଥିବାରୁ ତାଲିମ ଅଧିବେଶନ ସମୟରେ ମଧ୍ୟ ସେ ଯୌନ ନିର୍ଯାତନାର ଶିକାର ହୋଇଥିଲେ। ପୁଲିସ କହିଛି ଯେ ଏପର୍ଯ୍ୟନ୍ତ ୧୦ରୁ ଅଧିକ ଲୋକଙ୍କୁ ହେପାଜତକୁ ନିଆଯାଇଛି। ଝିଅଟିର ଏକ ବିସ୍ତୃତ ବୟାନ ରେକର୍ଡ କରାଯିବ।
