ଅଟୋ ସହ ପିଟିହେଲା ବିଧାୟକଙ୍କ କାର୍‌

ଖୋର୍ଦ୍ଧା,୨୫ା୧୧: ଖୋର୍ଦ୍ଧା ଜିଲା ଜଙ୍କିଆ ଥାନା ଅନ୍ତର୍ଗତ ବଡ଼ପୋଖରିଆ ଛକ ନିକଟରେ ସୋମବାର ଗଞ୍ଜାମ ଜିଲା ଖଲ୍ଲିକୋଟ ବିଧାୟକ ପୂର୍ଣ୍ଣଚନ୍ଦ୍ର ସେଠୀଙ୍କ ଗାଡ଼ି ଦୁର୍ଘଟଣାଗ୍ରସ୍ତ ହୋଇଛି।

ସୂଚନା ଅନୁଯାୟୀ, ବିଧାୟକ ସେଠୀ ଆଜି ଦିନ ପ୍ରାୟ ସାଢ଼େ ୧୧ଟା ସମୟରେ ଖଲ୍ଲିକୋଟରୁ ଭୁବନେଶ୍ୱର ଅଭିମୁଖେ ଯାଉଥିବା ସମୟରେ ହଠାତ ବଡ଼ପୋଖରିଆ ଛକ ନିକଟରେ ଏକ ଯାତ୍ରୀବାହୀ ଅଟୋ ପଛରେ ବିଧାୟକଙ୍କ ଗାଡ଼ି ଧକ୍କା ହୋଇଥିଲା । ଯାହା ଫଳରେ ଅଟୋରେ ଥିବା ଦୁଇ ଯାତ୍ରୀ ଆହତ ହୋଇଥିବାବେଳେ କାର୍‌ଟି ଭାଙ୍ଗିରୁଜି ଯାଇଛି। ବିଧାୟକ ସୁରକ୍ଷିତ ଥିବା ଜଣାପଡ଼ିଛି। ପୋଲିସ ଘଟଣାସ୍ଥଳରେ ପହଞ୍ଚି ଅନୁସନ୍ଧାନ ଜାରି ରଖିଛି।