ଅସହାୟଙ୍କ ଅବସ୍ଥା ଏମିତି…କିଏ ପିଲିଥିନ ତଳେ ତ କିଏ ପର ପିଣ୍ଢାରେ

କଳାପଥର (ବାଙ୍କୀ): କଟକ ଜିଲ୍ଲା ବାଙ୍କୀ ବ୍ଲକ ଅଧୀନ କଳାପଥର ଗ୍ରାମ ପଂଚାୟତର କଦମ୍ବପାଟଣା ଗ୍ରାମରେ ଜଣେ ଗରିବ ଅଛନ୍ତି। ପ୍ରଧାନମନ୍ତ୍ରୀ ଆବାସ ଯୋଜନା ପାଇଁ ଗୁହାର କରି ଥକି ପଡ଼ିଥିଲେ ହେଁ ସରକାରୀ ବାବୁଙ୍କ ପାଖରେ ଏପର୍ଯ୍ୟନ୍ତ ପହଁଚି ପାରିନାହିଁ। ଭଙ୍ଗା ଚାଳ ଘର ଉପରେ ପଲିଥିନ ଟାଣି ରହୁଥିବା ବେଳେ ଅତ୍ୟଧିକ ଝଡି ତୋଫାନ ଓ ଘଡ଼ଘଡ଼ି ସମୟରେ ଅନ୍ୟ ପିଣ୍ଢାରେ ଆଶ୍ରୟ ନେଉଛନ୍ତି। କଦମ୍ବପାଟଣା ଗ୍ରାମର ବାସନ୍ତୀ ଦେଇ ସ୍ବାମୀ ବସନ୍ତ କୁମାର ସାହୁ ଧାନ ଚାଷରେ ଅନ୍ୟର ମୁଲପାତି ଲାଗି ପେଟ ପୋଷନ୍ତି। ଏକ ମାତ୍ର ପୁଅ ମଧ୍ୟ କଳାପଥର ବଜାରରେ ଦୋକାନରେ କାମ କରନ୍ତି। ସରକାର କେବଳ ତାଙ୍କୁ ୩୫ କେଜି ଚାଉଳ ଯୋଗାଇ ଦେଉଛନ୍ତି। ଘର ଛପର କରିବାକୁ ଆବଶ୍ୟକ ସାମଗ୍ରୀ କିଣିବାକୁ ପାଖରେ ଟଙ୍କା ନଥିବାରୁ ବାଡ଼ି ପଟରୁ କାନ୍ଥ ଭାଙ୍ଗିରୁଜି ଗଲାଣି। ଏଭଳି ସମୟରେ ପରିବାର ପାଇଁ ମୁଣ୍ଡ ଗୁଞ୍ଜିବାକୁ ବାସ ଗୃହ ଖଣ୍ଡେ ପାଇଁ ଗୁହାରୀ କରି ଥକି ପଡ଼ିଥିଲେ ହେଁ ଏଥିପ୍ରତି ସରକାରୀ ବାବୁଙ୍କ ଦୃଷ୍ଟି ପଡୁନାହିଁ। ବହୁବାର ପଂଚାୟତରେ ଆବେଦନ କରି ଗ୍ରାମସଭାରେ ବାସନ୍ତୀ ଦେଇର ନାଁ ସୁପାରିଶ କରାଯାଉଥିଲେ ମଧ୍ୟ ହେଁ ଅଦୃଶ୍ୟ କୁଜି ନେତା ମାନେ ଅନ୍ୟ ହିତାଧିକାରୀ ମାନଙ୍କ ଠାରୁ ହାତ ଗୁଞ୍ଜା ନେଇ ଯୋଗ୍ୟ ହିତାଧିକାରୀ ପତ୍ରରୁ କାଟି ଦିଆଯାଉଥିବା ଅଭିଯୋଗ କରିଛନ୍ତି ବାସନ୍ତୀ ଦେଇ।