ନୀଳଗିରି: ନୀଳଗିରି ବିଧାନସଭା ଆସନକୁ ନେଇ ସାରା ଦେଶରେ ଚର୍ଚ୍ଚା ଚାଲିଛି । ରାଜ୍ୟର ୧୪୬ଟି ବିଧାନସଭା ଆସନକୁ ବିଜେପି ଘୋଷଣା କରି ସାରିଥିବା ବେଳେ କେବଳ ନୀଳଗିରି ଆସନ ହିଁ ଶେଷ ମୁହୂର୍ତ୍ତ ଯାଏଁ ଅଟକି ରହିଥିଲା । ଶେଷ ମୁହୂର୍ତ୍ତରେ ଅର୍ଥାତ ଗତକାଲି ବିଜେଡିର ଦାବିଦାର କୁହାଯାଉଥିବା ସନ୍ତୋଷ ଖଟୁଆଙ୍କୁ ଟିକଟ ଦିଆନଯାଇ ସୁକାନ୍ତ ନାୟକଙ୍କୁ ପ୍ରାର୍ଥୀଭାବେ ଘୋଷଣା କରିବା ପରେ ସବୁ ଅଙ୍କ ଅଡୁଆ ହୋଇ ପଡ଼ିଥିଲା । ଯାହା ପାଇଁ ସନ୍ତୋଷ ଗତକାଲି ବିଜେଡିରୁ ଇସ୍ତଫା ଦେଇଥିଲେ । ସେପଟେ ନୀଳଗିରି ବିଜେପି ଆସନ ପାଇଁ ଏସସିବି ମେଡିକାଲ କଲେଜର ପ୍ରାକ୍ତନ ଅଧ୍ୟକ୍ଷ ତଥା ନୀଳଗିରି ମାଟିର ସନ୍ତାନ ଡା. ପ୍ରତାପ ରଥଙ୍କ ନାମ ଘୋଷଣା କରାଯିବା ପାଇଁ ଦିଲ୍ଲୀ ପଠା ଯାଇଥିଲା । ଏ ସବୁ ପରିସ୍ଥିତି ଦେଖି ବାଲେଶ୍ୱର ସାଂସଦ ପ୍ରାର୍ଥୀ ପ୍ରତାପ ଷଡ଼ଙ୍ଗୀ ଗତକାଲି ଜରୁରୀକାଳିନ ପରିସ୍ଥିତିରେ ଦିଲ୍ଲୀ ପହଞ୍ଚି ନୀଳଗିରି ଟିକଟ ଘୋଷଣାକୁ ଅଟକାଇ ଦେଇଥିଲେ । ଆଉ କିଛି ସମୟ ଅତିବାହିତ ହୋଇ ଯାଇଥିଲେ ହୁଏତ ଡା. ପ୍ରତାପ ରଥଙ୍କ ନାମ ଘୋଷଣା ହୋଇ ଯାଇଥାନ୍ତି । ତେବେ ପ୍ରତାପ ଷଡ଼ଙ୍ଗୀ ହିଁ ଦିଲ୍ଲୀରେ ଡା. ପ୍ରତାପ ରଥଙ୍କ ନାମ ଘୋଷଣାକୁ ରୋକ ଦେଇ ସନ୍ତୋଷ ଖଟୁଆଙ୍କ ନାମ ପୁରାଇ ଦେବାରୁ ଆଜି ମଧ୍ୟାହ୍ନରେ ଦଳ ସନ୍ତୋଷଙ୍କ ନାମ ଘୋଷଣା କରିଥିଲା । ଏହି ଘୋଷଣା ପରେ ଆଜି ଭୁବନେଶ୍ୱରସ୍ଥିତ ଦଳୀୟ କାର୍ଯ୍ୟାଳୟକୁ ଯାଇ ସନ୍ତୋଷ ନିଜ ସହସ୍ରାଧିକ ସମର୍ଥକଙ୍କ ସହ ବିଜେପିରେ ମିଶିଥିଲେ ।
ସବୁଠାରୁ ବଡ଼କଥା ହେଲା, ଦୀର୍ଘ ବର୍ଷ ପରେ ଗୁରୁଶିଷ୍ୟ କୁହାଯାଉଥିବା ସନ୍ତୋଷ ଓ ପ୍ରତାପଙ୍କ ମିଳିନ ଘଟିଛି । ୨୦୧୮ରୁ ସନ୍ତୋଷ ଓ ପ୍ରତାପଙ୍କ ଭିତରେ ମନୋମାଳିନ୍ୟ ହୋଇଥିଲା । ଦୀର୍ଘ ୬ବର୍ଷ ପରେ ପୁଣି ଥରେ ଗୁରୁଶିଷ୍ୟ ଏକାଠି ହେବା ଘଟଣା ବେଶ୍ ଚର୍ଚ୍ଚାର ବିଷୟ ପାଲଟିଛି । ଅପରପକ୍ଷରେ ଭୁବନେଶ୍ୱର ବିଜେପିର ମହାମିଶ୍ରଣ ପର୍ବକୁ ଯିବା ପୂର୍ବରୁ ସନ୍ତୋଷଙ୍କ ନିର୍ଦ୍ଦେଶରେ ନୀଳଗିରି ବିଜେଡି ଅଫିସକୁ ଗୋବର ପାଣି ସିଞ୍ଚନ କରାଯାଇ ଶୋଧନ କରାଯାଇଥିଲା । ପରେ ସମସ୍ତ କର୍ମୀ ଜୟ ଶ୍ରୀରାମ ନାରା ଦେଇ ଭୁବନେଶ୍ୱର ଅଭିମୁଖେ ଯାତ୍ରା କରିଥିଲେ ।
